¿A quén non lle gusta o tiramisú caseiro? É imposible atopar un só larpeiro que diga o contrario. O tiramisú é unha desas sobremesas italianas vistosas e sinxelas que sempre saen ben e ao que podes recorrer cando tes unha visita, porque gusta a todos e porque ten unha presentación espectacular.
Nesta ocasión versionamos o clásico tiramisú e fixémolo á maneira do Pazo, facendo unha homenaxe ás framboesas que cultivamos nas nosas terras e coas que elaboramos as nosas marmeladas caseiras.
Nesta sobremesa notarás ao primeiro bocado a untuosidade do queixo cremoso, a acidez das framboesas, a dozura da marmelada e os deliciosos biscoitos empapados en todos os mollos. Unha delicia. ¡Xa verás que deliciosa combinación de sabores e texturas¡.
Que facer e que non cando elaboras tiramisú caseiro
- Calquera reposteiro italiano repetiríacho unha e mil veces: a calidade dos ingredientes é o principal factor do éxito desta sobremesa. Elixe o mellor queixo cremoso (mellor se é mascarpone) e framboesas de boa calidade.
- Podes facer na casa a marmelada coa froita de tempada, pero se non tes tempo ou non te queres lear demasiado, podes comprar a nosa marmelada caseira de framboesa na nosa tenda en liña. Xa sabes que a elaboramos en partidas pequenas e cunha receita tradicional.
- Punto e aparte dedicamos ao capítulo dos biscoitos de soletilla: merece a pena, e moito , que os compres caseiros. Se non os atopas na túa pastelería habitual, proba a encargalos. O teu tiramisú gañará moitos enteiros.
Ingredientes
- ½ cunca de manteiga de cacahuete
- 220 gramos de queixo cremoso
- 1 y ¼ de cunca de azucre glas
- 1 culleradiña de esencia de vainilla
- 1 cunca de crema
- ½ cunca de marmelada de framboesa Pazo de Vilane
- 14 biscoitos de soletilla
- 4 cuncas de framboesas
- Cacao en pó
Elaboración
- Coa axuda dunhas baleas eléctricas, bate a manteiga de cacahuete, o queixo crema, o azucre glas e media cunca de crema ata que logres unha consistencia homoxénea.
- Engade o resto da crema e bate de novo durante 2 minutos.
- Nun cunco aparte, bate a marmelada con ⅓ da cunca de auga. Vaite quedar un pouco líquida.
- Engade 3 culleradas desta mestura no fondo dun molde rectangular.
- Pon agora unha capa de biscoitos e por riba outra de marmelada.
- A continuación, engade a metade da masa batida e reparte 2 cuncas de framboesas (para formar outra capa).
- De novo , cobre con biscoitos.
- Unha vez máis, pon marmelada e coloca o resto da masa batida.
- Tapa o molde con filme e méteo na neveira, ao menos 8 horas.
- Retira o plástico, coloca as framboesas restantes e esparexe o cacao en po (vas facelo moi ben cun colador.
- Para finalizar, espolvorea con azucre glas.
