O salmorejo é un prato andaluz, máis concretamente da provincia de Córdoba, de orixe humilde, pero de sabor extraordinario.
Como é un prato económico e fácil de preparar, con ingredientes ao alcance da man de todas as clases sociais (tomates, aceite de oliva, pan e ovos) era unha das comidas típicas de verán que levaban os campesiños ao campo.
Fresquiño, suave e enerxético, os labradores solucionaban a comida do día con esta especie de sopa espesa, tan saborosa como saudable.
Hoxe día preside as mesas dos mellores restaurantes -nas súas diversas versións- en forma de fina muselina e acompañada cos máis orixinais ingredientes: desde uvas ata tomatiños desecados, pasando por froitos secos ou follas de albáfega.
É perfecta como entrante ou mesmo prato único dunha comida estival, e lucirá perfecta como prato festivo.
Non o dubides máis e sírvea hoxe mesmo na túa mesa. Choveranche as gabanzas!
Trucos para facer o mellor salmorejo
- O truco principal é elixir ben os ingredientes. Os tomates deben ser madurados ao sol (non de invernadoiro).
- O pan, mellor se é candeal e dun ou dous días (xa duro).
- Elixe un aceite de oliva virxe extra con moito corpo e sabor.
- Por suposto, os ovos campeiros, que sexan de Pazo de Vilane, porque as nosas galiñas pastan nos pastos verdes e frescos galegos todos os días do ano, e iso nótase. Verás que intensidade danlle ao prato!
Ingredientes
- 7-8 tomates vermellos maduros pequenos
- 1 dente de allo
- ¼ de barra de pan candeal
- 1 chorriño de aceite de oliva virxe extra
- Sal
- 2 ovos campeiros Pazo de Vilane
- 150 g de xamón serrano en anaquiños
- Opcional: pemento verde
Elaboración
- Remolla o pan en auga uns minutos.
- Pela os tomates, un dente de allo e tritúraos xuntos nun robot de cociña.
- Escorre ben o pan, engádeo, e volve a triturar ata deixalo ben fino.
- Sen deixar de triturar, vai incorporando o aceite nun fío moi fino, ata que o salmorejo vaia tomando unha textura cremosa, como de maionesa, e quede todo ben ligado.
- Engade sal, pero non demasiada, pois o xamón achegaralle bastante.
- Mete o salmorejo, tapado, na neveira, para que estea moi frío á hora de servir.
- Coce os ovos durante 10 minutos (a partir do primeiro fervor). Lévaos a auga fría e pélaos. Córtaos en anacos miudiños e reserva.
- Prepara o xamón serrano cortándoo tamén, ben fino.
- Serve o salmorejo frío en cuncos individuais, cun par de culleradiñas de ovo picado e xamón por encima. Se che gusta, podes engadir tamén pemento verde en anaquiños.
- Decorar cun fío moi fino de aceite de oliva.
