O arroz e os ovos campeiros fan unha parella estupenda: comprobaralo de seguido con esta saborosa ensalada de arroz que podes variar en mediterránea ou marroquí, segundo o gusto dos teus comensais ou a temática da túa comida.
Iso si, escollas a versión que escollas, estamos seguros de que esta ensalada de arroz se vai converter este verán nun dos teus pratos preferidos: pola súa orixinalidade e exotismo!
Ensalada de arroz: convértea en mediterránea ou marroquí segundo che apeteza
- O interesante desta ensalada de arroz é que lle podes dar un toque máis mediterráneo ou oriental (segundo teñas o día) con só variar o adubo ou as especias e sen modificar os ingredientes principais.
- Se prefires a ensalada de arroz mediterránea, engade uns anaquiños de olivas negras e uns taquiños de tomate natural. Acada o punto máis refrescante facendo un adubo de aceite de oliva, allo e unhas follas de albáfega ben machucadas.
- Pola contra, se a túa paixón é a comida norteafricana, sofrite nunhas gotiñas de aceite de oliva unha culleradiña de curry e outra de canela e mestura coa ensalada cando a emulsión estea fría. Engade, ademais, uns taquiños de coco fresco.
Ingredientes
- 250 g de arroz basmati, integral ou xasmín
- 2 ovos campeiros Pazo de Vilane
- ½ cunca de pasas
- ½ cunca de améndoas machucadas
- 4 allos tenros
- Ceboliño fresco
- 1 pisco de sal
- 1 pisco de pementa
- 4-5 culleradas de aceite de oliva
- 1 chorriño de vinagre
- ½ cunca de olivas negras (opcional)
- 6-7 follas de albáfega (opcional)
- 1 dente de allo pequeno (opcional)
- 1 cunca de anaquiños de tomate natural (opcional)
- 1 cunca de anaquiños de coco (opcional)
- 1 culleradiña de curry (opcional)
- 1 culleradiña de canela (opcional)
Elaboración
- Ferve o arroz con abundante auga e sal, tal como indique o paquete. Os máis recomendables para ensaladas son os das variedades basmati, integral ou xasmín. Deixa arrefriar e reserva nunha fonte.
- Mentres, coce os ovos campeiros durante 10 minutos (tras o primeiro fervor). Sácaos e arrefríaos en auga moi fría. Cando estean listos, pélaos e córtaos en anacos moi miúdos. Engade e mestura co arroz.
- Pica igualmente os allos tenros e o ceboliño e incorpóraos.
- Se che gusta a versión mediterránea, pica as olivas negras e o tomate natural, ben vermello. Engade e mestura.
- A continuación, prepara unha vinagreta con aceite de oliva, un chisco de vinagre, e as follas de albáfega e o dente de allo ben machucados. Engade ao arroz e remove.
- Se prefires a versión do norte de África, quenta o aceite de oliva coas culleradas de curry e canela e mestura xunto aos anacos de coco.
- En ambas as dúas versións, e xusto antes de servir, engade as pasas e as améndoas.
- Rectifica de sal e pementa se é necesario.
