Din que os bos recordos volven á memoria coa calor dos aromas agradables. E debe ser certo, porque sempre que percibimos o doce aroma do bandullo no forno do Pazo de Vilane comezamos a rememorar días de festa, familia e as risas da nosa infancia.
As nosas avoas –e mesmo as bisavoas– adoitaban preparar esta sobremesa (que lembra un pouco aos pudíns ingleses) en datas sinaladas como o Nadal ou o Entroido (o Entroido galego). Naturalmente, utilizaban ovos “da casa”, recollidos do galiñeiro moitas veces o mesmo día. Nese aspecto, pouco cambiamos.
O bandullo era unha receita das mulleres galegas sabias, desas que sabían aproveitar os alimentos que tiñan pola casa e brillar nas ocasións especiais. É xusto o que precisamos hoxe en día: unha sobremesa que cunde se sodes moitos na mesa, e que se elabora con ingredientes naturais e moi accesibles.
Por certo, recentemente o programa Fun polo Aire da Televisión de Galicia (TVG) visitounos para coñecer os nosos ovos campeiros e a nosa receita familiar de bandullo. Begoña, a nosa querida cociñeira, preparou en pouco tempo este doce mentres Nuria explicaba aos telespectadores as raíces e orixes do bandullo na familia Varela-Portas, ligada ao Pazo de Vilane desde o século XVIII.
Déixoche todos os ingredientes e pasos máis abaixo. Ou, se o prefires, podes seguir a Begoña neste vídeo. Xa nos contarás que tal che sae!
Ingredientes
- 500 ml de leite entera
- Media barra de pan en migas miúdas (mellor reseso)
- 100 gramos de pasas
- 1 puñado de piñóns
- Raiadura de limón
- 2 culleradas de manteiga
- 6 culleradas de azucre
- 6 ovos
Elaboración
- Pon o pan en remollo no leite.
- Engade tódolos ingredientes, menos os ovos e a manteiga á mestura.
- Derrete a manteiga e engádea.
- Bate os ovos e incorpóraos. Mestura todo cunha culler de madeira.
- Unta un molde con manteiga e espolvorea con fariña.
- Coloca un papel de forno no fondo e bota a mezcla.
- Introduce o molde no forno ao baño María (calor arriba e abaixo) a 180º, uns 45 minutos (dende que ferva a agua).
- Retira do forno cando ao pinchar o bandullo coa punta do coitelo salga limpia.
- Deixa arrefriar completamente antes de desmoldar.
