Receitas de inverno para loitar contra o frío

O frío xa se instalou de cheo e apetecen cousas quentiñas e reconfortantes, esas ricas receitas de inverno que a todos nos gusta desfrutar en días desapacibles.

As tardes son escuras e moi longas, por iso todo convida a quedarse na casa coa familia ou con amigos para degustar unha porción de tarta ou unha rica rosquilla á hora de merendar.

E é que dá igual que neve, chova ou “faga un día de cans”, se ao chegar á casa entoamos o corpo cunha sopa, uns ovos cocotte ou ao forno ou algún que outro prato con ingredientes invernais, como o bacallau ou os grelos, a vida vese doutra maneira.

De verdade, se pensabas que a estación fría carece de atractivos é que inda non exploraches todas as súas posibilidades culinarias. Segue a ler, que hoxe vas descubrir 10 receitas de inverno con ovos campeiros moi sinxelas, deliciosas e moi nutritivas.

Sopa castelá

Que sería de nós nos fríos días invernais sen a sopa castelá? Parece mentira que unha comida tan sinxela e de tan poucos ingredientes estea tan rica.

Na nosa receita de sopa castelá propoñémosche unha elaboración clásica: apenas allo, pan duro, xamón, caldo, pemento… E os mellores ovos campeiros, por suposto, que atoparás ao lado da casa!

Os moi sopeiros non quedarán decepcionados. Por algo é un dos pratos máis coñecidos (e recoñecidos) da gastronomía española.

Revolto de grelos e gambas

Os grelos teñen un sabor sorprendente e están cargados de nutrientes. Nacen xusto despois das xeadas, así que con eles vas poder preparar boísimas receitas de inverno, como este revolto de grelos e gambas que che propoñemos.

O prato en cuestión é rico e rápido coma poucos, e a pesar de estar cargado de nutrientes (fibra, vitaminas e un montón de minerais, como ferro, magnesio, cobre, potasio…), é moi pouco calórico. Por iso pode ser un prato único perfecto para levar á oficina ou para un plan de cea no sofá e película.

Ovos cocotte con xamón e trufa

Os ovos cocotte ou ovos ao forno en cazolo son unha das técnicas de cociñado de ovo que máis nos gustan no inverno. E é que, sen apenas manchar a cociña (porque ademais pódelos cociñar no microondas) e en poucos minutos consegues uns resultados espectaculares: un prato quentiño, saboroso e que combina ben con case calquera ingrediente que lle botes.

Nesta ocasión decidímonos po estes ovos cocotte con xamón e trufa sobre cama de verduras: máis fácil e versátil, imposible. Non sufras se che falta algunha verdura: improvisa e engádelle todo o que se che ocorra. Verás como isto dos ovos cocotte te engancha…

Ovos Villaroy

Se che encantan as croquetas, hoxe estás de sorte. Porque degustar por primeira vez a nosa receita de ovos villaroy (algo así como uns ovos duros “encroquetados”) é toda unha experiencia para o padal. Morrerás de gusto!

Como o prato é moi nutritivo, virache moi ben como segundo (hai quen os desfruta como aperitivo) despois dunha mañanciña de paseo fresquiño. Acompáñaos dunha ensalada variada e verás como desaparecen en segundos.

Ovos beneditinos

Metémoste na escena: mañá de sábado, chove e fai frío fóra, e o único que che apetece é preparar un bo almorzo, unha xerra de café quente, e abandonarte por completo á pereza mentres les os xornais.

Para este plan traémosche a mellor das receitas, ovos beneditinos, un almorzo aditivo para moitos. É saudable, enerxético e sinxelamente delicioso. Inclúeo no teu catálogo de receitas de inverno; non te arrepentirás…

Quiche de verduras e ovos campeiros

Outro prato san, exquisito e que é apropiado se sodes moitos na cas. Ademais, esta Quiche de verduras e ovos campeiros ten a vantaxe de que admite case que calquera ingrediente. Aproveita e incorpora estas verduras que fan saltar as alarmas nos nenos: anacos pequenos de brócoli, espárragos verdes, pementos vermellos ou verdes, cabazos, patacas doces…

E é que as quiches lémbranlles ás pizzas -aínda que a súa orixe, ingredientes e sabores son ben distintos- e por tanto, adoitan trunfar entre os máis pequenos da casa.

Bacallau dourado

Aínda que hoxe en día é ben sinxelo atopar bacallau salgado todo o ano, a súa tempada abarca dende finais de outono até a primavera. É, polo tanto, un dos peixes invernais por excelencia.

Encántanos o bacallau. En salsa ou á prancha está deliciosos, pero como nos volve tolos é nesta receita de bacallau dourado, unha das especialidades máis famosas e apreciadas dos nosos veciños portugueses que hai que degustar acabada de facer, para que as pataquiñas palla non perdan a súa textura crocante ao fundirse co ovo batido.

¡Verás qué delicia!

Escalope con ovo poché.

Traémosche un prato sinxeliño, dos de “fondo de armario”, pero para chuchar os dedos: escalope con ovo poché. A clave está en servilo acabado de facer, para romper o ovo e que a xema se funda en cada bocado de escalope.

Non esquezas que a verdadeira diferenza nesta receita márcana a calidade dos ingredientes: pan relado caseiro, a mellor tenreira e os ovos… campeiros e do Pazo, naturalmente!

Rosquillas

Non deixes pasar un inverno máis sen dedicar unha tarde de sábado a cociñar a nosa receita de rosquillas cos teus nenos. Despois terás que facer o “sacrificio” de merendalas… quentiñas, claro está!

Prepara o chocolate ou o café para acompañalas, que verás como lles vas empezar a atopar o gusto a iso das tardes supostamente tristes e escuras do inverno…

Torta de queixo estilo A Viña

A sobremesa que gusta a todos en Pazo pola súa suavidade e textura é esta torta de queixo ao estilo A Viña, o restaurante donostiarra que fixo famosa no mundo enteiro a receita orixinal. É case imposible probala e non repetir unha e outra vez porque non é nada doce de máis e fúndese no padal.

Poucas cousas che parecerán máis pracenteiras que servirte unha boa porción desta tarta -asegúrate de non callala demasiado por dentro- e degustala amodo mentres contemplas como cae a choiva dende a túa ventá.

Mug cake de chocolate

Os moi chocolateiros adoramos este mini biscoito que poderás preparar en menos de 5 minutos e de forma tan sinxela que non darás creto. Este mug cake de chocolate pode ser un premio especial para os nenos ou un capricho doce para ti, ti decides.

Tamén é un excelente candidato como sobremesa sinxela e rica para convidados: prepara tantos como comensais en cuncas individuais e engalánaos coas nosas marmeladas artesanais. Trunfarás de seguro!

Como ves, as baixas temperaturas tamén nos traen alegrías gastronómicas. Por iso, ao mal tempo, boa cara, di o refrán, e estamos seguros de que estas riquísimas receitas de inverno che axudarán a sorrir de orella a orella.

Arrodéate de quen máis queres para saborealas e comprobarás que os días máis fríos do ano poden ser moi especiais.

Gustouche este artigo? Pois ofrecémosche moito máis! Subscríbete ao noso boletín e recibirás un libro dixital gratuíto!