Poucos doces teñen o poder de transportarnos, cun só golpe de olfacto, ao corazón do outono. ¡O biscoito de castañas é un deles!
Este bolo cálido e reconfortante acompaña coa mesma elegancia un almorzo en familia, un café ao carón da cheminea ou un té con leite a media tarde.
O seu aroma envolvente e o seu sabor suave, lixeiramente doce, permítennos dedicar as tardes chuviosas de finais de ano a amasar recordos que teñen o agarimo como principal ingrediente.
Ademais, a súa versatilidade convérteo nunha sobremesa ideal para coroar as celebracións de Nadal. Decorado cun pouco de azucre glas ou acompañado de froitas de tempada, ¡este doce é unha aposta segura para calquera reunión!
O único truco para que a receita saia perfecta é seguir minuciosamente cada paso e empregar en todas as súas etapas ingredientes de calidade. Se xa fixeches algunha das nosas receitas, saberás que os ovos caseiros das nosas galiñas criadas en liberdade marcan a diferenza, achegando esponxosidade e sabor a cada creación, ademais dun cor moito máis intenso.
Dito isto, ¡átate ben o mandil e deixa que o outono entre na túa cociña! Esta receita de biscoito de castañas será, sen dúbida, a proposta gañadora da tempada.
Orixe e historia do biscoito de castañas
- Para comprender a orixe deste delicioso doce, debemos viaxar ás rexións montañosas e rurais de Europa –incluíndo Italia, Francia e España–, onde o frío do inverno ameazaba con forza. Nesas zonas, as castañas convertéronse nun alimento básico para sobrevivir, grazas ao seu alto contido en hidratos de carbono.
- Co paso do tempo e grazas á súa versatilidade, a castaña transformouse nun ingrediente moi común na gastronomía destas rexións. Aos nosos antecesores gustáballes tanto que a empregaban para elaborar pan e facer sopa, cando non a consumían cocida ou asada. ¡Que manxar tan sinxelo e saboroso!
- As castañas adquiriron tanta relevancia no sur de Francia que chegaron a coñecerse como “o pan dos pobres”, xa que era habitual convertelas en fariña e empregalas para dar forma a diferentes masas, ¡entre elas as dos nosos adorados biscoitos!
- Durante os séculos XVIII e XIX, comezouse a usar o puré de castañas, tal e como o coñecemos hoxe, para achegar un sabor e unha textura únicos aos pasteis. Para iso combinábase con outros ingredientes naturais, como o leite fresco ou os ovos caseiros de galiñas criadas en liberdade. Estes últimos, non sempre fáciles de conseguir, podes atopalos nos nosos puntos de venda máis próximos.
- Os biscoitos de castañas foron gañando popularidade nas zonas rurais de Francia, debido á abundancia deste froito, ata converterse nunha marabillosa tradición que acabou estendéndose a outros países de Europa.
- Así, o biscoito de castañas foi incorporándose pouco a pouco ás receitas locais e adaptándose aos gustos e ás posibilidades de cada rexión.
- Na actualidade, este doce gózase en moitas partes do mundo, non só como un postre estacional, senón tamén como unha alternativa deliciosa para aniversarios, celebracións ou, simplemente, para achegar un toque de maxia a un día calquera.
Ingredientes
- 3 ovos caseiros Pazo de Vilane
- 300 g de castañas
- 50 g de manteiga
- ¼ vaso de coñac
- 120 g de azucre mascabado (azucre integral de cana) ou, se prefires, azucre branco ou moreno
- 30 g de azucre avainillado
- 2 estrelas de anís
- 70 g de maicena
- 250 ml de leite
- 1 cucharadiña de fermento químico (tipo Royal)
Elaboración
- Lava as castañas coa súa pel, fai unha pequena incisión en cada unha para que non estoupen e ponas a cocer en auga durante 20-25 minutos xunto co anís estrelado.
- Cando aínda estean quentes, e coa axuda da punta dun coitelo, retira a pel e extrae a carne. Ao facelo morniñas, a pel sairá sen ningunha dificultade. Iso si, ¡coidado con queimarte! Non é necesario que estean abrasando.
- Nunha cazola, engade o leite, o coñac e as castañas peladas. Unha vez que estean brandas (uns 40 minutos, aproximadamente), tritura todos os ingredientes coa axuda dun batedor de man e deixa arrefriar.
- Bate os ovos, o azucre mascabado (é máis saudable que o azucre branco ou moreno, aínda que, se non o tes na casa, podes usar calquera destes dous na mesma proporción) e o azucre avainillado, ata que a mestura quede espumosa.
- Incorpora a crema de castañas, a manteiga en dados, a maicena e o fermento. Integra todos os ingredientes cunha espátula, con movementos suaves e envolventes, ata obter unha crema doce e aromática.
- Engrasa un pouco o molde, verte a mestura e enforna durante 20-25 minutos a 180º. Espera a que arrefríe para desmoldar.
