Algunha vez pensaches en facer carne de porco asada nas túas comidas máis especiais? Proba e non te decepcionará.
Na mesa lucirache como un roast beef, pero sairache moito mellor de prezo. Ademais, se escolles unha boa
carne, sorprenderache a súa tenrura e zumarenta.
A clave, sen dúbida, está no proceso de maceración: non teñas présa e baña a carne polo menos durante
dous días. Verás como merece a pena. A nós gústanos este mollo que che propoñemos: leva loureiro, tomiño, cebolas, cenorias e un taliño de apio. Agora ben, se che gusta o resaibo do ourego e do romeu, non o dubides e engádeo. Para chuparse os dedos!
Os mellores acompañamentos para o porco asado
- Nesta ocasión recomendámosche que acompañes o porco cos mollos do asado, por unha banda, e dunha deliciosa salsa de marmelada de framboesas (ou de froitos vermellos) por outra. Ese toque agridoce vai estupendamente á carne. Verás que contraste!
- O porco asado tamén pide a berros un bo puré de patacas caseiro, mellor machucado con paciencia, coa axuda dun garfo e dun fio de aceite de oliva que triturado coa batedora. Combínao coa salsa de carne e verás que delicia.
- Se che privan as verduras, coce unhas cenorias e uns chícharos tenros en auga, engadindo varias culleradas da marinada (en tal caso, prepara máis cantidade).
- Tamén podes pasar polo ferro –cun pouquiño de manteiga- unhas mazarocas de millo previamente cocidas.
- Márcaas a lume forte e quedaranche deliciosas.
Ingredientes
- 1,5 kg de lomo de porco
- Para o macerado: 750 ml de viño branco seco
- 500 ml de vinagre de viño branco
- 1 cebola grande
- 2 cenorias
- 1 folla de loureiro
- 1 ramiña de tomiño
- 1 talo de apio
- 2 dentes de allo
- 1 culleriña de grans de pementa negra
- 2 culleradas de sal groso
- 3 follas de xarxa
- Para a salsa de marmelada de framboesas: 200 ml de auga.
- 125 ml de viño doce,
- 125 gr de marmelada de framboesas Pazo de Vilane
- 1 culleriña de fariña de millo
Elaboración
- Dous días antes de facer o lombo, pon todos os ingredientes do macerado nun recipiente de cristal con tapa grande: o viño e o vinagre, a cebola cortada en tiras finas, a cenoria en anaquiños ou en toros, o loureiro, o tomiño, a pola de apio, os allos picados, os grans de pementa negra, o sal, as follas de xarxa e o aceite de oliva. Mestura ben.
- Faille uns cortes transversais lixeiros ao lombo e reparte ben todo o macerado, para que se impregne ben.
- Coloca o lombo dentro do recipiente, e durante eses dous días, dálle a volta de cando en vez, deste xeito o mollo penetrará na carne e quedará moito máis zumarenta e con máis sabor.
- Cando chegue o día do asado, saca o lombo 1 hora antes do frigorífico, para que se tempere, e prequenta o forno a 220º.
- Nunha bandexa apta para forno, coloca o lombo coa parte graxa cara arriba e cobre coa metade da marinada. Reserva o resto. Enforna durante 30 minutos (calor arriba e abaixo, sen ventilador).
- Pasado este tempo, dálle a volta e rega co resto do macerado (se o ves moi seco podes engadir un pelín de auga) e volve introducir no forno. Baixa a temperatura a 190º e déixao uns 30 minutos, sempre dependendo do teu forno.
- Mentres se fai a carne, prepara a salsa de marmelada de framboesas. Pon a auga a quentar nun cazo. Cando ferva, engade o viño e deixa a lume forte uns minutos, para que se evapore o alcol.
- Incorpora a marmelada de framboesas e deixa cocer uns minutos máis a lume medio. Cando estea listo, pásao por un coador, para que a mestura quede ben fina.
- Lévao de novo ao cazo. Engade aos poucos a culleriña de fariña de millo diluída previamente en auga, ata que consigas unha textura máis espesa (ao teu gusto).
- Cando estea enfornado o lombo, saca a fonte e tapa todo o asado –coa salsa do fondo incluída- cun papel de aluminio, durante 30-40 minutos.
- Destapa, filetea o lombo e recolle os mollos aparte para facer unha salsa. Serve con ambas, a da carne e a de framboesas.
